Kamfanin Dillancin Labaran ƙasa da ƙasa na Ahlul-Baiti (ABNA) ya ruwaito cewa: Hukumar Lafiya ta Duniya (WHO) ta yi gargadin tabarbarewar yanayin lafiya a yankunan Falasdinu da aka mamaye, ciki har da Gabashin Kudus, kuma ta jaddada cewa tabarbarewar jin kai da ke ci gaba da faruwa ya haifar da asarar rayuka da kuma rugujewar tsarin lafiya sannu a hankali.
Gargadin ya zo ne a cikin wani rahoto da Tedros Adhanom Ghebreyesus, Darakta Janar na Hukumar Lafiya ta Duniya, ya gabatar wa zaman kwamitin zartarwa na 158, kuma ya bayyana alamun damuwa na tsawon lokaci daga 1 ga Janairu zuwa 31 ga Agusta, 2025.
Rahoton ya bayyana cewa an samu mace-mace 18,004 da kuma kamuwar mutane 160,660 da cutar a yankin Falasdinu da aka mamaye a wannan lokacin, inda ya yi ishara da cewa kaso 54% na wadanda suka kamu da cutar da kuma kashi 60% na wadanda suka mutu yara ne, mata da tsofaffi, wanda hakan ke nuna tasirin tabarbarewar lafiya ga gungun da suka fi rauni.
Ya ci gaba da bayyana cewa mummunan halin da ake ciki ba wai kawai ya takaita ne ga manufofin samar da kayayyakin kiwon lafiya ba, har ma ya haɗa da ƙarancin magunguna, kayan aiki da mai, tare da sarkakiya a tsarin amincewa da shigar da kayayyaki, wanda ke haifar da jinkiri ko ƙin amincewa gaba ɗaya. Wannan yana barazana ga ci gaba da muhimman ayyuka kuma yana kawo cikas ga ƙoƙarin agaji da ceto. Rahoton ya kuma yi ishara da cewa kayan aikin kiwon lafiya na ceton rai na dala miliyan 6.15 suna bakin mashiga suna jiran amincewa da su don shiga wajen Zirin Gaza, wanda hakan ke ƙara ta'azzara tsarin kula da lafiya a takaice dai Isra’ila ta hana ko tana yawo da hankali kan shigar da kayayyakin kenan.
A fannin cututtukan da suka shafi annoba, rahoton ya yi gargaɗi game da yaduwar cututtuka masu yaɗuwa saboda gurɓatar ruwa, rashin kyawun ayyukan kiwon lafiya, cunkoso da yin ƙaura. Rahoton ya yi cikakken bayani game da yawan kamuwa da cututtukan numfashi masu tsanani, gudawa mai ruwa da jini da kuma ciwon jaundice mai tsanani, gami da mutane 1,039 da ake tsammani da kamuwa da cutar jaundice mai tsanani a watan Agusta na 2025, mutane 241 da ake tsammanin kamuwa da cutar meningitis mai ƙwayar cuta da kuma mutane 94 da suka kamu da cutar Guillain-Barré, tare da wasu mace-mace da ke da alaƙa da waɗannan cututtuka.
Rahoton ya kuma rubuta hare-hare 335 a kan cibiyoyin lafiya tsakanin watan Janairu zuwa Agusta na 2025, wanda ya yi sanadiyyar mutuwar mutane 112 da kuma raunata mutane 329, wadanda suka faru a tsakanin Yammacin Kogin Jordan da Zirin Gaza. Wannan ya nuna irin barazanar da marasa lafiya, ma'aikatan kiwon lafiya da cibiyoyin kiwon lafiya ke fuskanta.
Ya kuma yi ishara da katsewa da kwashe marasa lafiya daga Zirin Gaza saboda iyakoki da aka sanya, yana mai bayanin cewa mutane 7,642 ba su iya barin wurin ba duk da bukatar da aka gabatar a ranar 27 ga Agusta 2025, yayin da jimillar adadin marasa lafiya da ke bukatar dauke marasa lafiya da ya kai kimanin 15,600, ciki har da kusan yara 4,000, kuma tabarbarewar ta kara ta'azzara tun bayan rufe mashigar Rafah a watan Mayu na 2024.
Darakta Janar ya kammala rahotonsa da kira ga dukkan bangarorin da su bi yarjejeniyar tsagaita wuta, tabbatar da ci gaba da tsaron ayyukan jin kai da lafiya, da kuma fadada damar shiga kayayyakin kiwon lafiya ba tare da wani sharaɗi ba a duk fadin yankin Falasdinawa da aka mamaye, gami da cibiyoyin kula da lafiya a matakin farko da asibitoci, don hana ci gaba da tabarbarewar lafiya da jin kai.
Your Comment