Kamfanin dilancin labaren Siriya na Sana, ya rawaito cewa wasu makamai masu linzami 4 da jiragen Isra'ila suka harba daga tekun Mediterrenean kusa da birnin Latakia da ke gabar teku sun afkawa filin jirgin saman Aleppo da yammacin ranar Laraba.
Baya ga hakan a cewar Sana, makamman garkuwa game da hare haren sama na Siriya, sun murkushe hare haren, inda suka kakkabo makamai da dama, amma wasu sun afka cikin yankin Kiswa.
A nata bangare kungiyar kare hakkin bil adama ta Syria OSDH dake cibiya a Biritaniya, ta ce an kai harin ne kan titin jirgin sama, inda gobara ta tashi.
Wannan dai shi ne karo na 23 da Isra'ila ke kai hare-hare kan wasu yankuna a Siriya tun farkon wannan shekara, a cewar kungiyar kare hakkin bil'adama ta Siriya.
A ranar 25 ga watan Agusta, jerin hare-haren "daga cikin mafi muni" da Isra'ila ta kai kan sansanin soji a kusa da Hama a tsakiya da kuma Tartous a yamma sun yi sanadin mutuwar mutane da jikkata.
A farkon watan Yuni, wasu munanen hare-hare da Isra’ilar ta kai sun sa titin jirgin sama daya tilo da ke aiki a filin jirgin saman Damascus ya daina aiki na tsawon kwanaki da yawa.
342/
