Iran a shirye take ta bude tattaunawa da kasashen Hadaddiyar Daular Larabwa da Saudiyya

(ABNA24.com) Ministan harkokin wajen Jamhuriyar musulunci ta Iran Muhamad Jawad Zarif wanda ya bayyana hakan ya kara da cewa;A lokacin da na zama ministan harkokin waje na yi rubutu a jaridar “Sharq Ausat” da a ciki na bayyana cewa; A shirye muke mu bude tattaunawa, domin tattaunawa za ta amfani wannan yankin ne da kasashen da suke cikinsa.”

Zarif ya kara da cewa; Killace wata kasa guda daya da kasashen larabawa na yankin tekun pasha su ka yi, ba abu ne wanda ya dace ba, don haka wajibi ne mu karfafa tattaunawa a cikin wannan yankin.

Ministan harkokin wajen kasar ta Iran ya kore labarin da ake yawo da shi na cewa; Yarima mai jiran gado na Saudiyya ya tuntubi Iran domin bude tattaunawa.

Zarif ya kara da cewa; A lokacin da Saudiyya ta fara kai wa kasar Yemen hari,ta tsammaci cewa za ta iya mamaye kasar cikin kankanen lokacin, sai dai mun yi imani da cewa; Ba abu ne mai yiyuwa ba a iya samun galaba akan al’umma guda.


/129