Kamfanin dillancin labaran Abna ya habarta maku bisa nakaltowa daga shafin sadarwa na IRNA cewa, ma’aikatar lafiya ta zirin Gaza ta fitar da wata sanarwa inda ta sanar da cewa a cikin sa’o’i 24 da suka gabata an ciro gawarwakin shahidai 7 daga karkashin baraguzan gine-gine sannan kuma wani Bafalasdine daya ya yi shahada sakamakon raunukan da ya samu a harin da ‘yan mamaya suka kai a zirin Gaza.
Ma'aikatar lafiya ta Falasdinu a Gaza ta kara da cewa: Haka kuma, an kai mutane 11 da suka jikkata zuwa asibiti a daidai wannan lokacin.
A cewar wata sanarwa da ma'aikatar lafiya ta Falasdinu a Gaza ta fitar, adadin shahidai a yankin ya karu zuwa shahidai 48,405 tun daga farkon hare-haren wuce gona da irin na gwamnatin mamaya a ranar 7 ga Oktoban 2023.
Ma'aikatar ta kuma sanar da cewa adadin wadanda suka jikkata ya karu zuwa 111,835.
A cewar IRNA, sojojin Isra'ila sun gaza cimma manufofin da suka ayyana a tsawon kwanaki 471 na yaki da kisa a zirin Gaza, inda a karshe aka tilasta musu amincewa da shan kaye a tinkarar gwagwarmaya da kuma yarjejeniyar tsagaita bude wuta.
A karshe bayan da aka yi ta cece-kuce da takun saka na cikin gida tsakanin yahudawan sahyoniya da ministocin gwamnatin kasar, yarjejeniyar tsagaita bude wuta a zirin Gaza ta fara aiki a yammacin Lahadi 20 ga watan Janairu.
An tsara aiwatar da wannan yarjejeniya tare da kammala shi a matakai uku, amma kawo yanzu ba ta shiga mataki na biyu ba saboda cikas da gwamnatin Isra'ila ta yi.
Your Comment