Kamfanin dillancin labaran kasa
da kasa na Ahlul-Baiti (A.S) – ABNA ya habarta maku cewa: – ‘Yan Nijar da suka
fusata daga birnin Agadez da ke tsakiyar jamhuriyar Nijar, sun taru a ranar
Lahadi a gaban sansanin sojin Amurka na 201, wanda ke dauke da sojojin Amurka
tun shekara ta 2013. Masu zanga-zangar sun yi kira da a janye sojojin Amurka,
suna rera taken: "Wannan Agadez ce, ba Washington ba" Dole ne sojojin
Amurka su barta".
An gudanar da zanga-zangar ne kwanaki biyu bayan da Washington ta amince da janye dakarunta tare da shirin tura tawagar Amurka zuwa kasar ta Afirka nan da 'yan kwanaki masu zuwa domin sanin cikakken bayanin janyewar.
A cikin watan Maris ne dai rundunar sojin Nijar ta sanar da cewa ta karya yarjejeniyar soji da Amurka, inda ta ce an kakabawa kasar wannan yarjejeniya ne, don haka kasancewar sojojin Amurkan ya sabawa doka.
A ranar 26 ga Yuli, 2023, wasu gungun jami’an Nijar daga kwamitin tsaro na kasa sun tsige shugaba Muhammad Bazoum saboda “rashin iya aiki da ci gaba da tabarbarewar tsaro” a kasar.
Bayan kwanaki biyu, Janar Abdourahamane Tchiani ya zama shugaban rikon kwarya na kasar.
Sabbin hukumomin Nijar sun kuma soke yarjejeniyar soji da Faransa, wanda ya tilastawa kasar Faransa janye sojojinta daga kasar.