Kamfanin dillancin labaran Kasa da kasa na Ahlul-Baiti (AS) – ABNA- ya habarto maku cewa: Majiyoyin Falasdinawa a yammacin jiya Juma’a ne suka bayar da rahoton cewa, a yammacin jiya Juma’a ne aka gudanar da wani zama da ba kasafai ba tsakanin shugabannin kungiyar da kuma kungiyar Ansarullah ta kasar Yemen, inda aka tattauna hanyoyin da za a bi wajen daidaita al’amura na ayyukan gwagwarmaya.
Daya daga cikin wadannan majiyoyin da ta bukaci a sakaya sunanta ta bayyana cewa: A makon da ya gabata ne aka gudanar da wani muhimmin taro inda manyan jagororin kungiyar Hamas, Jihad Islami, da kungiyar jama’a ta 'yantar da Palastinu da kungiyar Ansarullah ta kasar Yemen suka halarci taron.
Ya kara da cewa: A cikin wannan taron, sun tattauna hanyoyin daidaitawa tsakanin wadannan bangarori dangane da ayyukan da za su auka wa gwamnatin sahyoniyawa a mataki na gaba.
A cewar wata majiyar, wacce ita ma ba ta so a bayyana sunanta ba, kungiyar Ansarullah ta jaddada a cikin wannan taron cewa za ta ci gaba da gudanar da ayyukanta a cikin tekun Bahar Ahmar na yaki da jiragen ruwa da ke kan hanyar zuwa ga gwamnatin sahyoniyawan.
Majiyar ta kara da cewa: A wannan taro an tattauna rawar da kungiyar Ansarullah ta taka tare da bangarorin Palastinu, musamman akan yiwuwar harin da gwamnatin sahyoniyawa zata kai a Rafah.
Amma Wannan rahoton bai bayyana inda aka yi wannan tattaunawar ba.
A ranar Alhamis din da ta gabata ne shugaban kungiyar Ansarullah ta kasar Yemen Abdul Malik al-Houthi ya sanar da fadada hare-haren da ake kai wa jiragen ruwa da ke da alaka da gwamnatin sahyoniyawan zuwa jiragen da ke kaucewa tsallakawa tekun bahar maliya da kuma ta tekun Cape of Good Hope da ke tekun Indiya.
Tun a ranar 19 ga watan Nuwamba kungiyar Ansarullah ta fara kai hare-hare kan jiragen ruwa na kasuwanci a tekun Bahar Maliya da kuma Tekun Arabiya wadanda suka ce suna da alaka da ita ko kuma suke shiga tashar jiragen ruwan Isra'ila.
Hare-haren na Ansarullah ya sa kamfanonin sufurin jiragen ruwa da dama sun karkatar da jiragensu daga Cape of Good Hope, lamarin da ya kara tsawaita tafiya tsakanin Asiya da Turai da akalla mako guda tare da kara kudin jigilar kayayyaki.