Kamfanin dillancin labaran shafin sadarwa na yanar gizo na Ahlul-Baiti (A.S) - ABNA - ya habarta cewa, babban sakataren kungiyar Hizbullah Sayyid Hasan Nasrallah, ya yi kira ga al'ummar Larabawa da na musulmi da su bukaci gwamnatocinsu da su janye jakadunsu daga kasar Sweden, sannan su kori jakadun Sweden daga kasashen Larabawa da na Musulunci.
A jawabin da ya gabatar a lokacin taron Ashura na daren uku da kungiyar Hizbullah ta gudanar a yankunan kudancin birnin Beirut, da kuma sharhi kan wulakanci da kona kur'ani da wani mutum ya yi a karkashin kariyar 'yan sandan Sweden a Stockholm, Sayyid Nasrallah ya yi kira ga gwamnatin Lebanon da ta janye jakadan Lebanon ko mukaddashin jakadanci daga kasar Sweden, tare da korar jakadan kasar Sweden daga kasar Lebanon, wanda wannan mataki shine mafi rauni.
Sayyid Nasrallah ya ce: "Mun yi takaici kuma muna bakin ciki da abin da ya faru a yau na wani sabon aiki na kazanta da ya wulakanta Alkur'ani mai girma," ya kara da cewa "abin da muka gani na tunzura al'ummar musulmi ne, kuma a fili yake cewa duk wanda ya kona Alkur'ani ko kuma ya tozarta kur'ani mai tsarki ya kasance da izinin gwamnatin kasar Sweden, kuma shi ne wanda ya kona kur'ani a wani lokaci da ya gabata."
Sayyed Nasrallah ya jaddada cewa wulakanta kur'ani yana shafar dukkan musulmi kuma ba ya shafar wata kungiya koma bayan wata, don haka mutane suna da hakkin bayyana fushinsu.
Sannan kuma ya kara da cewa: "Wannan kasa daya ce take maimaita wannan batancin, kuma bangaren wawaye da ke goyon bayan wanda ya aikata wannan aika-aika, sun yi kokarin nuna cin mutunci ga kasashen Iraki da Iran, amma cin mutuncin Alkur'ani cin fuska ne ga dukkanin musulmi, yana mai gargadin dagewar "Mosadi" na Isra'ila kan tayar da fitina, saboda a karon farko ba ta samu maida martanin daya dace ba, don haka suka kara komawa don tunkarar duk wata fitina da za ta sake haifar da yaki da su.
Jagoran ya yaba da matsayin Iraki kan wannan aika-aika, yana mai bayyana abin da gwamnatin Irakin ta yi da cewa "aiki ne na jaruntaka da hikima, da kuma kyakkyawan matsayi, a lokacin da ta gayyaci mai kula da harkokin Irakin tare da korar jakadan kasar Sweden daga Iraki, tare da yin kira ga kasashen Larabawa da na Musulunci da su yi koyi da hakan."
Jagoran ya ci gaba da cewa: Idan har muna son kada a sake kona Alkur'ani mai girma da kuma wulakanta kur'ani mai tsarki da ya faru a kasar Sweden, to dole ne dukkan kasashen Larabawa da na Musulunci su yi abin da Iraki ta yi.
Ya kuma yi kira ga ‘yan’uwa maza da mata a duk unguwanni da kauyuka da su hallara gobe a duk masallatai dauke da Alkur’ani su zauna suna masu kira ga gwamnati da ta tashi tsaye kan kasar Sweden, ganin cewa wannan shi ne mafi karancin abin da za a iya yi.
Ya kara da cewa "Kira na biyu shi ne a hada karatun kur'ani mai tsarki a wurare, tare da yin kira ga al'umma da su zo majalisu gobe suna masu runguma da kur'ani mai tsarki inda ya jaddada cewa" wajibi ne duniya baki daya ta ga lokacin da aka wulakanta kur'anin mu, yadda muke runguma da karanta shi.
Sayyid Nasrallah ya kammala jawabin nasa da cewa mataki na gaba shi ne yanke alaka da kasar Sweden idan har aka maimaita laifin da aka aikata a littafinmu mai tsarki.
.................
gama / 232