Kamfanin dillancin labaran Ahl al-Bait (AS) -ABNA- ya habarta cewa, kakakin ma'aikatar harkokin wajen kasar Iran ya bayyana cewa: Jamhuriyar Musulunci ta Iran tana goyon bayan aiwatar da shawarwarin siyasa da kuma warware matsalolin lumana don tabbatar da zaman lafiya ga yankin kasar Libiya.
Nasser Kanaani ya bayyana matukar damuwarsa kan rikicin baya-bayan nan a birnin Tripoli fadar mulkin kasar Libiya, ya kuma jaddada bukatar gaggauta dakatar da wadannan tashe-tashen hankula da kuma warware sabanin da ke tsakanin bangarorin da ke rikici da juna bisa kiyaye muradu da tsaron al'ummar kasar ta hanyar tattaunawa.
Kakakin ma'aikatar harkokin wajen kasar Iran ya kara da cewa: Jamhuriyar Musulunci ta Iran tana kira ga dukkan bangarorin da abin ya shafa da su yi taka-tsantsan da kuma hana barkewar rikici tare da neman fifikon maslahar al'ummar kasar Libiya.
Kanani ya jaddada cewa: Jamhuriyar Musulunci ta Iran tana goyon bayan aiwatar da shawarwarin siyasa da samar da mafita cikin lumana da ke kiyaye hadin kan kasa da zaman lafiyar kasar Libiya da kuma biyan bukatun al'ummar wannan kasa da zasu kai ga ci gaban kasar Libiya.