INA GWAMNATI TA KAI SHAIKH ZAKZAKY?

INA GWAMNATI TA KAI SHAIKH ZAKZAKY?

INA GWAMNATI TA KAI SHAIKH ZAKZAKY?

sanin kowa ne cewa a ranar Talata 15/05/18 gwamnatin jihar Kaduna ta sa aka dauko Jagoranmu Shaikh Ibraheem Zakzaky da matarsa Malama Zeenah Ibrahim da karfin tsiya daga inda ake tsare da su a Abuja, aka gurfanar da su a gaban wata babbar kotu da ke garin Kaduna. An tuhume su da zargin aikata laifuffuka guda takwas, ciki har da ta kisan wani soja. Duk da cewa jami’an tsaro sun killace duk wata hanyar da ke kaiwa zuwa ga kotun a tsawon lokacin da aka dauka ana sauraron karar, amma dai ‘yan tsirarun jama’ar da ke harabar kotun da kuma Lauyoyin Shaikh Zakzaky, sun gan shi lokacin da ya sauko daga motar da ta kawo shi; sun kuma ga lokacin da ya hau motar da ta kawo shi, aka tafi da shi bayan sauraron karar. Haka nan duniya ta shaidi hotunan zuwansa kotun.


To, abin tsoro da takaicin shi ne tun bayan barin Jagoran namu kotu da iyalinsa a ranar Talatar ba a sake jin duriyarsu ba. Ga dai abin da babban dansa, Mal. Muhammad Ibraheem Zakzaky ya ce a wani shafin Dandalin sada zumunta na zamani: “Yanzu fiye da awanni 30 ke nan tun lokacin da na ji wani abu daga wajen mahaifana.” Inna lillahi wa inna ilaihi raji’un!


Wannan mataki da gwamnati ta dauka na hana masu hakki sanin inda aka kai Jagoranmu, wani abu ne da yake bako ga dokokin da kasar nan ke bi. Akalla dai iyalan duk wani dan kasa da ake zargi da aikata wani laifi a kotu suna da hakkin sanin inda dan’uwansu yake tsare. Haka nan kuma Lauyoyin duk wani wanda ake tuhuma a kotu suna da hakkin sanin inda wanda suke karewa yake, in fa ana maganar bin doka da oda ne. To, wai me ya sa in wani abu ya shafi ’yan’uwa musulmi na Harkar Musulunci a Nijeriya da aka fi sani da ‘yan Shi’a, sai gwamnati ta take dokokinta, ta yi biris da su, ta yi abin da masu jan akalarta suka ga dama, kai ka ce kasar nan ba a kan doka take ba?!


Ya kamata duk wani ko wasu masu kaunar zaman lafiya a kasa, su tunatar da wannan gwamnatin da take bin Harkar Musulunci tana murjewa iya son ranta cewa, wannan mataki da suka dauka na baya-bayan nan na jefa al’ummar musulmi cikin duhun sanin ina Shaikh Ibraheem Zakzaky yake a tsare, wani abu ne da ba za mu amince da shi ba. In har gwamnati da kanta za ta rika take dokokinta, to su waye take so su rika bin doka da oda? Ai yin haka sharar fage ne na jawo hautsini a cikin kasa!


Bari a gurguje mu tuna wa jama’ar kasa da ma al’ummar kasa da kasa irin zaluncin da aka yi mana tun Disambar 2015. Shaikh Zakzaky, ba fa zuwa aka yi aka ce ana son a kama shi ba. Harbin bindiga kawai aka biyo shi da shi har gida. Kafin a kai gare shi sai da aka kashe rayuka sama da dubu. Shi ma kansa da iyalansa an harbe su. Aka kashe masa ‘ya’yansa samari guda uku, aka kona masa Yayarsa da ranta da wasu mabiyansa, aka rusa masa gida da kadarori. Aka kama daruruwan mabiyansa aka tsare a wuraren da ake tsare da jama’a. Sannan kuma ya je kotu, kotu ta yanke hukuncin cewa, lallai an zalunce shi, a sake shi tun 2016, amma gwamnati ta yi kememe ta ki sakin sa. Sai yanzu kuma bayan ya shafe shekaru biyu da rabi a tsare, aka zo aka ce wai ana tuhumar sa ne ma da wasu laifuffuka, ciki har da na kisa! Haba jama’a wannan wane irin rashin adalci ne da bakin zalunci?


Lokaci ya yi da jama’a za su tuno da zancen magabata masu hikima da ke cewa, ‘mulki ba ya tabbata da zalunci.’ Hakika da irin wannan danniya da ake mana, mulkin azzalumai ba zai dore ba. Don haka muna jaddada kiran da muka shafe shekaru biyu da rabi muna yi na cewa a sakar mana Jagoranmu da gaggawa ba tare da wani sharadi ba da sauran ‘yan’uwanmu da ake tsare da su! Yin hakan ne kawai mafita. Amma Allah na nan a Madakata.


SA HANNUN

SHAIKH ABDULHAMID BELLO ZARIYA

18/05/18


Ka aiko da Ra'ayinka

Your email address will not be published. Required fields are marked *

*

Quds cartoon 2018
Sakon Jagora Ga Maniyyata Hajjin Bana (1438-2017)
پیام امام خامنه ای به مسلمانان جهان به مناسبت حج 2016
We are All Zakzaky